Skip to main content

1 - معالم تــــائهــــة

أتسائل كثيرا عن مدى طبيعية أفكارى فلا أرى أى مؤشر
كنت فى فترة ما أبحث عن كل التفاصيل المنطقية التى تربطنى بعالم الفتيات
او أبحث عن سبب يجعل الصفة القابعة فى مربع النوع فى بطاقتى الشخصية صفة حقيقية
توقفت عن البحث
لانى ادركت عبثية ما أريده
فحين كان أكثر ما يشغل الفتيات هو التعرف على الحب واختبار القبلة الأولى والعثور على شريك قبل أوانه بعشر سنوات
كانت أحلامى مثار سخرية لهن حين كانت أحلامى تنحصر فى الحصول على أورج 7 أوكتاف وعدتنى أمى به
أو تعلم رسم البورتريه لانى دائما لا أجيد الأنف
أو إقتناء ديوان نزار الكامل وحزنى على استحالة تحقيقه
وبعدها بثلاث سنوات ومنذ العام الأول فى كليتى لم تكون تخلو أى محادثة بينى وبين فتاة
من المحاور الثلاث الرئيسية وهى بالترتيب
1-      س وص ظبطوا مع بعض ، ع  و ل سابو بعض وهى منهارة تماما ( مع العلم إنهم ارتبطوا الاسبوع اللى قبلها بس ) ، فلانة وفلانة كانوا بيتخانقوا امبارح لان واحدة خطفت خطيب التانية ولما سالتها هم اتخطبوا امتى اصلا تقولى ( فى حكم المخطوبين يعنى )

2-      شفتى امبارح اللى حصل ( ......) اتصل بيا وقاللى انى وحشته انتى عارفة ده بجد اكتر واحد حبيته فى العشرين اللى ارتبط بهم قبل كده
3-      وانتى ايه اخبارك ... ظبطتى ولا لسة معقوووووووول إزاى وعارفة تعيشى من غير حب  ده انتى كبرتى اوى يعنى ايه محبتيش قبل كده(على فكرة انا وقتها كان عندى 17 سنة) طب على فكرة فلان قالى انه معجب بيكى اوى هو بيخاف يقولك بس قاللى اتاكد بطريقة غير مباشرة  وبيقول انه حزين اوى ( رغم انى مثلا مبكونش اتكلمت معاه غير مرتين لم يتعدوا ال 5 دقايق ..
طبعا ده كان بيأكدلى انى فى واد وكل الدنيا فى وادى لانى وقتها كان مهم اوى عندى اكتشف قصص الحب اللى انتهت بالموت او الفراق لانها بتعيش اطول كان كل اللى شاغلنى لمدة كذذا سنة بعدها الحب نفسه مشالرجل اللى هيشاركنى الاحساس ده كنت طول الوقت بحب الحب بس مش عارفة احب او اشوف اى حد تانى زى ماكل البنات كانت بتستجيب لاى محاولة ... طبعا ده مش معناه انى انا صح انا عارفة اصلا ا نده شعور غير طبيعى
واذكر انى فضلت سنين كتير بتشد اكتر لمستر دارسى فى كبرياء وهوى او اى بطل خيالى تانى او ميت طبعا زى يحي شاهين و محمود ياسين وهاريسون فورد اكتر ما بتشد لاى شخص حقيقي
فطبعا واضح انى طولت فوق شوية لما تعبت من التحليق بقى قررت ابدأ رحلتى للأرض
وفوجئت بتغييرات غريبة
شفت ناس كتير بنت حياتها وظبطت الدنيا احيانا عن حب واحيانا لمجرد عمل اسرة فقط واكمال سنة الحياة بصرف النظر عن الشخص نفسه
طبعا فى الوقت د ه انا كنت مقتنعة تماما ا ن ده افضل وقت ممكن البنت تبنى فيه نفسها
تكمل دراسات اخرى تنمى اهتمامتها
تعمل حاجات كتير الا كبت مستقبلها
طبعا كل  ده كان فى منتهى الانانية منى مكنتش بعمل حساب اهلى او الناس اللى بيحبونى ولا شاب محترم مثلا كان مفروض اديله فرصته كان انشغالى التام فعلا بكل حاجاة عايزة الحق اعملها كأن الايام هتجرى
وطبعا الحمد لله فقت فى الوقت المناسب هو انا مش فقت لا انا عملت اللى المفروض الناس كلها تعمله لان فعلا دى فى الآخر اسمها سنة الحياة هم برضه بيقولو كده
ودلوقتى تزوجت حديثاً ولسة لم ارزق ببامبينو بعد طبعا لان بقالى 7 شهور بس
وطبعا كما هى عادة الناس دائما السؤال الباكر والقلق الباكر جداااااااااااااا
ما ذكرنى بكل هذا هو انى منذ يومين كنت أتحدث مع زميلة لى فى العمل
وأخبرتنى حين عرفت ان لى تطلعات واحلام اخرى اجهزها للمرحلة القادمة
" المفروض اول حلم يكون لكى دلوقت البامبينو"
وتعجبت كثيرا لانى فى داخلى وعلى الرغم من ان كل صديقاتى اقتربن من وضع المولود الثانى او الثالث "لازلت اقول لنفسى ... دلوقتى؟؟؟؟؟ طب مش الأول .............
واكشفت مجموعة كبيرة جداااااااااااا من الاحلام لسة جوايا
انى لسة عايزة اعيش تانى بنفس الإنطلاق القديم
طب ازاى بقى ؟؟؟
ليه مش بفكر زى باقى البنات ؟؟؟؟؟؟
بجد نفسى اشيل دماغى واحط مكانها آيس كريم ميجا بالشوكولاتة البيضا
وطبعا هتبقى اخر مرة افكر فيها اصلاااااااااااااااااااااا
J

Comments

شوفى يا حنون
إنتى مخك زى الفل و ما فيهوش أى حاجة غلط
إنتى عملت إللى إنت عايزاه وقت ما حبيتى تعمليه و دى حاجة ما فيهاش غلط و لا حرام
أوعى تسيبى المجتمع يحطك فى القالب زى معظم الناس الثانية
حافظى على إختلافك دى أحسن حاجة فيكى صدقينى
حتحسى بكدة بعدين بعد 10 سنين لما تلاقى كل إللى فى سنك بقوا نفس الكلام نفس الشخصية و إنت حاجة مختلفة و جميلة كل الناس بتعجب بيها
بس كثير بيخافوا منها فى الأول بس لو قربوا بيلاقوا شخصية حلوة قوى جوة
أنا عارفة إللى إنت حاسة بيه عشان أنا أشبهك قوى
تحياتى
أيام الكلية أنا كنت ضد أي علاقة حب و ارتباط و كدة
لن النماذج اللي كنت بشوفها غير مطمئنة خالص ..
اغماءات و مرض و فشل دراسي و جنون .. و محاولات انتحار ..
ماكنتش فاهمة الناس مالها يعني :)

أنا كان طموحي كله مختزل في إني أحوش عشان أشتري كتب و يبقى عندي مكتبة كبيرة
بس
مش غلط إنك تكوني متفردة دة جميل غنك تكوني إنتي و مش مصطرة تبقي شبه حد :)
hanan khorshid said…
شهرزاد

للاسف انا بحس احيانا ان المجتمع فعلا بدأيحطنى فى القالب بتاعه
انا بقاوم كثير بس الناس مش بتسبنى فى حالى بتنصب نفسها دايما حاكم ومقدر لمدى طبيعيتى
انا فعلا تعبت بحس دايما انى ولا عارفة اعيش فى القالب زى كذا مليون بنت
ولا قادرة اعيش بره القالب زى عدد محدود انقذ نفسه
hanan khorshid said…
شوشو
انتى عارفة زمان كانت كل الناس تسخر منى من ايام ثانوى
واكنوا بيقولولى دايما هو انتى كل فلوس معاكى تروحى تشترى بها كتب او مثلا
انتى مجنونة يعنى ايه كتاب ب 20 جم
هههههههههه
بس عارفة بقى انا اللى كسبت فى الآخر
عشان لما كبرنا اصبح فى بيت كل واحدة مكتبة تلفزيون تحتوى على الريسيفر والدى فى دى او البلاى ستيشن
وبعض التحف فقط
اما انا فقد اصبح عندى مكتبة جمييييييييلة جدااا ومتنوعة جدا وكل كتاب فيها لسة فاكرة اشتريته منين وكنت حاسة بايه ساعتى
الله فكرتينى بايام حلوة اوووووووووى

Popular posts from this blog

فوبيــا اللــوبيـــــا

فوبيا الأماكن المرتفعة فوبيا الحشرات السوداء فوبيا الظلام فوبيا الزلازل فوبيا الأماكن المغلقة فوبيا الزحام  فوبيا الأشياء الصغيرة المتجمعة أو المتلاصقة  كالثقوب أو النتؤات ( ودى أسوأهم بالنسبة لى ) معرفش ليه كفوبيا اللوبيا وحرف (W) لما بيتكتب كابيتال على الكيبورد عدد متلاصق منه كمان زى شكل قطاع عرضى من البصلة متعددة القلب وكشكل بيت النحل وحبيبات الجير فى إعلانات كلوس آب فوبيا عدم القدرة على الإنجاز فوبيا مواجهة الجماهير أنوااااااااااااع كتيييييير تشعرنى بالعجز التام وعدم القدرة على المواجهة أكثر ما يثير استغرابى فى موضوع الفوبيا ده انه ممكن يكون وراثى غريب أن فى أنواع  أخدتها من أمى الأغرب  أن فوبيا مش مشهورة زى فوبيا الأشياء المتلاصقة دى موجود فى اسرتنا بأكملها رغم ان فى ناس ميعرفوش عنها حاجة .... الأغرب تحكمها فى أعصاب الأنسان وإفقاده أى حركة للمقاومة فى بعض الأحيان قد يكفى صرصار واحد لإصابتى بهارد أتاك !!! لا استطيع أيقاف الصراخ والبكاء والرعشة إذا تأكدت من أنه بيطير (وهو غالبا بيطير ) ما يؤكد لى ان الفوبيا خاصتى تقتصر على الحشرات السوداء ..هو أنى أحب الفأر شكلا وليس موضوعاً طبعا .... فى حين أن الصرصار …

رسالة لن تصل :(

صباح مشمس آخر بدونك جدتي
السلام علي روحك الطيبة أينما حلت
وكأن عادية الاشياء تفرض وجودها
وبعد أن أفتح عيوني علي بكاء الصغير أنتظر قولك اليومي لا يقابلني إلا الصمت 
 يتوقف الصغير وينظر خلفي مشدوها ألتفت كي أراك تجلسين علي حافة الفراش تسوين شعراتك فلا يقابلني سوي الفراغ
ألهث في أحلامي خلف صوت أقدامك علي الارضية الخشبية ليلا 
 يترافق صوتك جليا مع كافة القضايا والمواقف والمشاحنات اليومية المعتادين علي دلوك فيها، أيصيبنا التعود باحد أنواع الجنون أم أن روحك الطيبة تخبرنا بما يعتمل علينا
تتكشف لي حقيقة كل نصائحك عن إطعام الصغير والقطة وإشعال الضوء ليلاً 
عدم تكرار طقوسك اليومية ينشر الخواء في أنحاء الدار
 ذلك المقعد المرئي واللا مرئي يخفق قلب كل من يمر به ويهاب الجلوس عليه؛ المقعد الفارغ الفاغر فاهه ينظر إلينا بتشفي
الطاولة الصغيرة التي تجاوره والتي ابتاعها لك أكبر أبناءك ليقرب اشيائك منك علي  مدار اليوم تتوسطها الساعة المنبهة التي احضرها لك لسهولة ادراك الوقت
ما حولها كئيب وفارغ إلا من علامات قيعان الأكواب التي احتسيت فيها شايك مؤخرا نرفض إزالة الغبار والفتات عنها 
وحدة الأدراج الصغيرة المجاورة لفراشك …

الكائن البيضوحباطي فى حياة كل مننا :(

الكائن البيضوحباطى *
كائن يتغذى على جرعات النكد المتكررة
وموجات الاحباط الى يبثها اليك على مدار اليوم
البيضوحباطى يعرف جيدا كيف يحيلك إلى كائن يائس محبط
يعرف كيف يمتص الحياة من أنفاسك لتغدو شخص ميت يمشى ويتكلم كالنائم
الكائن البيضوحباطى
يجد دائما الشماعة متى احتاج اليها
ليعلق عليها اخطاؤه وفشله
الكائن البيضوحباطى
منزه عن الخطأ :/
هو مبيعملش حاجة وحشة بس الكون كله هو اللى ضده
وكل الناس مستقصداه -_^
الكائن البيضوحباطى
متمكن جدا فى تخصصه
يستطيع تحويل اليوم فى لحظة إلى يوم عصيب جداااااا
وتحويل الاوقات الجميلة الى مشاحنات ونكد غير محدود
لا يفكر ابدا فيما يجب عليه فعله
فقط يفكر فيما يحتاجه
يجد سعادته فى تحويل لمعة الفرح والحياة فى عينيك
إلى وميض حزين ملئ بالهم والغم
 الكائن البيضوحباطى اساسى جدا فى حياتك
قد يكون بعيد قد يكون قريب
لكنه دوما موجود
ربما مبعوث لتخليص ذنوبك واخطاءك فى حق آخرين
أو ليسهل دخولك الجنة
الكائن البيضوحباطى لا يوجد علاج له
فقط يمكنك انت البحث عن سبيل للعلاج
كإغلاق أذنيك عند ارتفاع انزيم الاحباط فى كلامه
أوالتشويش على جهاز الاستيعاب الخاص بك
كى لا تفهم ما يفعله
ايضا يمكنك أن تتناول قطعة من الشوكو…