قبل ما ابدأ البوست احب اقول شىء عامة وبشكل خاص لزوجى العزيز اللى استغرب جدا اعتراضى بعد قراءة الخبر
كلامى لا ينم عن اى هدف شخصى او اى مشكلة شخصية
الحمد لله احنا لم نتعرض لاى مشكلة من النوع ده وان شاء الله مش نتعرضلها ابدا
كلامى يخص السيدات كلهم بشكل عاااااام
**************
فى مقال عن جريدة الشروق ليوم الخميس الموافق 21-7-2011بخصوص ما يلى
انفراد جريدة الشروق بعرض مشروع قانون الاسرة الجديد باسم 25 يناير لعام 2011
طبعا الجزء الوحيد الى هيكون سليم من وجهة نظرى اللى على قدها يعنى هى ان حسب ما فهمت كده ان الجواز العرفى مش هيكون معترف به اصلا ... ودى حاجة اكيد هتقلل الانحلال بنسبة كبيرة
طب تمام اوى اللى بعده بقى
........
قديما فى كل الافلام والمسلسلات
بل الاكثر والاقسى كان على أرض الواقع
عندما نرى زوجة طلع عين اهل اللى خلفوها فى جوازة لا تحتمل من شخص غير آدمى بالمرة
كان بيقدر يزهق فيها زى ما هو عايز طبعا
ويزهقها من نفسها واحيانا يدفعها للانحار ندماً على جوازهل وافتقادا ً لايام كانت عايشاها فى سعادة وراحة بال قبل ما تعرفه
وقتها يصير ابغض الحلال هو الحل الأوحد وليس له احتمالات اخرى
كلنا حافظين سيناريو فيلم اريد حلا للرائعة فاتن حمامة
وطبعا بعد ما يطلع عينها وعين اهلها هى مجبرة على احتمال كل القرف
لان مش من حقها تتكلم ماهى العصمة فى ايد سى السيد
ولما كانت تحاول تعمل اى حركة للفلفصة زى انها تشتكيه او ترفع قضية طلاق او نفقة اوى اى حاجة
كلنا طبعااااااااااا حافظين الجملة على لسان معظم ابن آدم الشرقى
....
لا مش هطلقك هسيبك كده زى البيت الوقف لانتى طيلة سما ولا ارض ها ها ها ها ها بصوت شرير فى آخر المشهد
.....
وخد عندك بقى انذارات بالطاعة
وبهدلة فى الاقسام واطفال بتتقطع بين الاتجاهين
....................
ده طبعا لان الرجل بطبيعته مفترى واحسن واخد يستغل الصلاحيات
.......
وبعد سنين ومن خلال قانون الاول من نوعه لانصاف المرأة استنادا على حديث سيد الخلق صلى الله عليه وسلم
قدرت المرأة أخيرا ترفع راسها
ولما اصبحت بتلاقى الحياة مستحيلة بتقدر تتنسلخ منها بكل هدوء طبعا مش بمناسبة ومن غير مناسبة لان دلوقتى الستات الوعى عندهم اكثر واكيد مش هيهدمو حياتهم بايديهم بس كل واحدة عارفة كويس ايه النقطة اللى الحياة عندها هتبقى مستحيلة ولازم تضع لها حد سواء بقىبسبب الاستنزاف او للاهانة او للطمع او للخيانة او البخل او القسوة او الجفاف انا طبعا مقلتش الضرب لانى مش بعتبر اللى بيرفع ايده على زوجته اصلا رجل هو اى حاجة تانية بتحول تكسب نفسها صفة الرجولة بالضرب... الاسباب كتير والرجالة عموما مش بتسيب سبب
اعتقد ان المرأة ابسط حق لها انها تقول خلاص مش عايزة اعيش معاك تانى
فى ناس كتير بتقول ان فى سيدات كتير اساؤا استخدام القانون ده
وانا برد عليهم بان فى رجالة كتييييييييييييييير قبل القانون اساؤا استخدام صلاحياتهم
ومستحيل هيكون نفس العدد لان المرأة بطبيعتها التنطيط والحذلقة وبخس الآخرين مش قضيتها الاولى الاهم عندها انها تعيش فى امان ومستقرة نفسيا وتكون حياتها هادية مع شريك او من غير شريك مش فارقة
فى حين ان الرجل مشكلته دايما انه يثبت انه الاحق باى حاجة والصح فى اى وضع وان اللى قدامه دى مش مقدرة ومش فاهمة
ولازم تتحمل حذلقته فبالتالى صلاحية وضع تتر النهاية مهم اوى عنده انها تقتصر عليه هو بس عشان يعرف يذل فى الاجيرة اللى عايشة معاه
يبقى مين بقى هيستغل الصلاحيات اكتر
.......................
وبعدين قانون الخلع حتى لو كان فى نسبة تضررت منه بس النسبة الاكبر عاشت مستقلة
اصبح فى بعض العدل داخل البيت وطبعا ده بس مش بسبب ان الست كانت بتلجأ له لا ده لان الرجل كمان اصبح عارف كويس بينه وبين نفسه ان اللى متجوزها دى مش اما لا دى انسانة هتقدر فى اى وقت تزهق فيه تطير من العشة
فزى ماهى كانت بتحافظ على مشاعره اصبح هو كمان بيحافظ على مشاعرها مش على سبيل الخوف طبعا لا على سبيل الحب برضه بس من منظور تانى
وكلمة اخيرا بخصوص موضوع استغلال الصلاحيات ده ... احنا كلنا عارفين ان البنت كرامتها بتوجعها من غير حاجة يعنى لو زوجها طلقها مش هتلومه حتى لو كانت عايزة تستمر معاه لان دى حرية شخصية مش غصب
فى حين ان لو الست هى اللى طلبت الطلاق ده بيخلى الزوج يصر اكتر على قهرها ويبتدى يفكر بقى ازاى يقرفها عشان تنفصل بالشروط والتنازلات اللى هوشايفها
مش فى دماغه لا كرامة ولا حب فى دماغه ان محدش هينهى الصفقة غييره بالشروط اللى هو شايفها
.......................
محور تانى ظريف جدا بيقول ان الولاية التعليمية للابناء بعد الطلاق تبقى من حق الزوج
طب لو الطليق مش فاهم حاجة فى حياته او مش فى دماغه تعليم ولاده بطريقة كويسة او بيفكر باى طريقة اخرى
ليه هو بس اللى يكون له حق تحديد المصير التعليمى لأبنائه
على اساس انه خلفهم لوحده مثلاااااا؟؟؟؟!!!!
.... وطبعا المحور الخاص بسن الحضانة واللى كان بيرعب مش الامهات بس لا كمان الابناء
وكلنا عارفين ان فى حالة الطلاق الابناء بيكونوا عيزين البقاء مع الام بدون تفكير طب ليه سن الحضانة يرجع للنظام القديم طبعا ده مش لان الرجل بيحب اولاده الرجل اول حاجة بيعملها فى الظروف دى انه يروح يتجوز
لكن الهدف من البوينت دى انه يمنع التفكير فى الطلاق عند الست نهائيا وحتى لو اطلقوا يقدر يذل اكتر واكتر عشان يوصل لافضل اتفاق ممكن
...............
وطبعا المحور الأظرف هو الخاص بقضايا الطاعة
ده التعديل اللى فيه اصلا مش محتاج كلام
..................
اخيرا بقى انا اللى هيجننى ازاى بلد فيها 85 مليون
يعنى لو اعتبرنا ان السيدات فيهم 40 مليون بس
مين اللى ينصب شخص واحد بس بتقديم مشروع قانون عن 85 مليون بدون مايعرف رأى نصهم اللى هم السيدات
للدرجة دى القهر هيرجع أقوى يعنى هى تبقى ثورة على القيادات وذل للسيدات
طب هل ممكن يتوافق عليه فعلا طب لو اتوافق عليه نرجع للظلم والطغيان اللى كان موجود من قبل قوانين الاسرة
........................
انا مش دارسة قانون طبعا ومعلوماتى عن القوانين زى معلوماتى عن اللغة الصينية بالظبط
لكن اللى اعرفوا ان تغيير قانون الاحول الشخصية هيكون شىء فى منتهى الظلم وخاصة لو كان دون استفتاء يقدر كل فرد فيه يدلى برأيه
ولو ده حصل فعلا انا اول واحده هتظاهر ضده بس هشوف مكان جديد غير التحرير وروكسى ممكن يكون ماسبيرو مثلا لو كان فاضى وقتها طبعاً
