Skip to main content

حاجات بتعمل "تـــــــششششششش" فى دماغى النهاردة


                                        1
الماج ده فزت به كجائزة تقديرية عن أول رواية قصيرة كتبتها فى حياتى
كنت فى ثانية ثانوى
وكان فى مسابقة فى القصة القصيرة بين مدارس محافظة الجيزة التعليمية
وأنا دخلت بقصة اسمها "وداعا .. حبى المعذب" فكسبت الماج ده كمركز مش فاكرة الثالث او الرابع
حسيت بقيمة كبيرة اوى وقتها رغم بساطة الماج
بس دى أول مرة فهمت فيها ان الهواية اللى كانت بتمتعنى انا بس .... واللى ممكن الناس تستخف بها هى حاجة بيحترمها الجميع
أكثر شىء اكد لى ده بعد سنين كتييير
هو التدوين وفكرة المدونات بشكل عام
ان ناس تكتب حتى لو كانوا مش مشهورين
وناس كتير يقرأو لهم رغم انهم مسمعوش عنهم قبل كده
بدون دور نشر واحلام لسنين مبتتحققش
ده عرفنى حاجة ان ممكن الحلم يتحقق بشكل أو بآخر
مش لازم الحلم يقتصر على طريقة معينة
أمبارح حلمت إن المج إنكسر وصحيت زعلانة جدا وحسيت إنه مؤشر مش حلو
فجبته من عند ماما النهاردة
وطول الطريق كنت بسترجع إزاى بضعة صفحات اتكتبت بأسلوب غير ناضج أدبيا
فرحتنى وقتها كل الفرحة دى 
............................
                 2
مقدار التغير والإشارة التابعة له 
او بلغة الإقتصاد القيمة المضافة
فى الكلية كنا دايما بنحسبه كالتالى
فى كل عام يجب حساب القيمة المضافة للمشروع
وهى ما تساوى رأس المال الحالى-راس المال للعام الأول = القيمة المضافة
أى القيمة اللى أضيفت إلى راس المال
وبالتالى لو صاحب المشروع وجد القيمة المضافة
zero
أو كانت القيمة المضافة ماينس
هنا لازم يصفى المشروع
لو طبقنا مفهوم القيمة المضافة على الحياة هيبقى لازم كل كام سنة نحسب القيمة المضافة لعمرنا
ونحدد هل نعيش ونتمسك بالساعات اللى بتمر ونفرح  بكل يوم بيجي
ولا نتخلص من الحياة ويكون الإنتحار هو النهاية المثلى للمشروع وللكراهية الحديثة للحياة
إمبارح جيت احسب القيمة المضافة إكتشفت التالى :
ضعف فى الصحة الجسدية
وهن فى الصحة النفسية
إفراط فى الحساسية لاى مؤثر وسرعة غريبة فى إنهمار الدموع
تساقط فى الشعر
زيادة فى بعض الكيلو جرامات
شعور عام بالاحباط واليأس
هبوط فى معدل الطموح
هالات من الأرق حول العينين
زيادة فى عدد الكوابيس
زيادة شديدة فى معدل الخوف
...........................................
                   3
هى ........ سيدة طيبة اوووووووى
كانت بترأس القطاع لحد النهاردة
ولأن الشغل أهم حاجة فىى حياتها
ولأن هى كانت بتحب كل قطاع الحسابات وهما بيحبوها
لانها طيبة
ولانها لا تحترف الأسافين
ولأنها مرت بظروف مرضية وعائلية عصيبة
ترى العمل هو كل مالها فى الحياة
فوجئنا بانها من كام يوم رفضت وكما هو متبع تلقى المجاملة أو الكشف كما يسمى فى لغة الموظفين
ورفضت من الشركة إقامة حفل تكريم لها
وانقطعت عن المجىء بدون أن تودعنا
رفضت ان ترانا اليوم فى عيد ميلادها الـ60
ترفض تماما الإجابة على هاتفها
ترفض ان يسمع اى مننا صوتها
كيف يستطيع إنسان يقضى نصف يومه فى مكان لمدة 40 سنة
ان ستيقظ فى اليوم التالى ولا تربطه بهذا المكان اى صلة
هذا هو ما تشعر به مدام / م
...................................................
                                                                           4

                                                    
                                                          روبى عيان
كان مستكين النهاردة اوى نايم معظم اليوم مش بينونو خااااالص
وبينظر نظرة حزن لكل واحد يكلمه
ونظرة عتاب لماما لما  تآخد منه كيس الفرسكس عشان بيتعب بطنه
مقضيها نظرات واهنة حزينة
مش نونوة وقلق زى ما عودنا
يا رب تخف يا روبى كلنا بنحبك اوووووى
....................................................

                            5
أنا صدعت جدا وعينيى وجعتنى وشاعرة بالدوران ونقص شديد فى الأوكسجين
أكيد من القلق وخوفى من الكوابيس
ومن أنبوبة الغاز المفقودة فى مصر كلها مش عندى بس 
والأكتئاب الربيعى بتاع كل سنة
وماكينة القهوة اللى نسيت اعقم القطع بتاعتها الاسبوع ده
والحاجات اللى علطول بتلف فى دماغى
وشغل  البيت اللى مش عارفة هخلصه بكره ازاى
ومسرحية  عفروتو اللى زوجى فارضها بشكل قسرى عليا ككل يوم أجازة
طبعا لأن الأنثى هى القلب الاكبر اللى لازم يستوعب كل حاجة
حتى لو كانت مسرحية بتتعاد للمرة المائة على التوالى
...................................................
أنا بجد كل يوم بسال نفسى يا ترى الناس كانت عايشة ازاى قبل ما يطرحو كتافلام فى الأسواق
 ....................
تصبحوا على خير

Comments

حنان
فكرة حلوة إنك تكتبى عن كذا حاجة فى بوست واحد
و لا دة عشان إنتى مقلة كسل يعنى
سلامة القط انا كمان عندى قطة برشيان بيضاء و حامل دلوقتى
انا حأعلق على الجزء الأول
فكرة المدونات و إن ناس تقرأ لنل حتى لو كنا مش مشهورين رائعة لأنها بتضمن إننا نوصل كلامنا للناس حتى لو عدد قليل
و تكفينا شر الذل لناشر او رئيس تحرير
و كثير منا مش محتاجين أو عايزين يشتغلوا كتاب
هم بس هواه
و على فكرة الجوائز إللى بنكسبها فى الطفولة بتفرح أوى أنا كمان كسبت واحدة من دول زمااان و شجعتنى أوى
تحياتى
hanan khorshid said…
شهرزاد
مرسى خااااالص على الزيارة والكومنت
ان شاء الله تقوم بالسلامة
احنا جبنا لروبى عروسة بالاتفاق مع اهلها واقامت معانا اسبوعين
شيراز مون فيس زيه وعمرها زيه
بس تخيلى محصلش بينهم وفاق
ههههههههههههه
او تقريبامكنش موسم التزاوج بتاعها
ايه البوست الجميل والمتنوع دا ياقمرتى

ربنا يسعدك يارب

مزيد من التوفيق لشخصك الجميل

تحياتى
ايناس
hanan khorshid said…
مرسى يا نوسة خالص انتى اجمل والله
نورتينى جداااااااا بالزيارة
:)
الكتابة وحب الانسان ليها تنبع عن موهبة بداخل كل واحد\ فينا يوجد من يحترفها ويوجد من يظل هواى

واحنا هنا فى عالم التدوين نكتب ما نشعر ونحس بية

انا عن نفسى اكتب بحرية دون اى التزام بقواعد ادبية

لانى كل همى توصيل الفكرة او الهدف مما اكتب

ربنا يوفقك ويكرمك

مع خالص تحياتى
hanan khorshid said…
تامر نبيل موسى
مشكور جدااااا على الزيارة
فعلا افضل ما فى التدوين هو عدم الخجل او الخوف من النجاح
يعنى هنا الواحد بيكتب اى حاجة لو كان المدون شخص مشهور مكنش هيكتب بنفس الحرية او الثقة
الجوكر said…
كوكتيل رائع

وسفرة متنوعة الجمال

تذوقنا مالذ وطاب

من صنوف الابداع

حنان

قلمكِ مميز

ومدادهُ راقى


مودتى
hanan khorshid said…
الجوكر

مرسى كتييير
على اطرائك الرائع
حقيقى فرحنى

اشكر لك زيارتك واشكر جدااااا اطرائك
Tamer Moghazy said…
اولا:العنوان "فريد جداااا من نوعه"

ثانيا: علاقتنا الرمزية بالاشياء بتكبر كل يوم عن يوم لدرجة ممكن توجعنا لو فقدنا اشيائنا الحميمة..!!

ثالثا: اتعلمت حاجة جديدة اسمها "القيمة المضافة" ممكن تكون غيرت مفاهيم جوايا لسنين جاية (اوعدك اني مش ها انسى استخدمها كتير في حياتي)

رابعا: انحناءة احترام وتحية لرئيسة القطاع اللي قل ما يوجد مثلها ويتصرف بهذا الرقي.

خامسا: انا مبسوط اني جيت هنا :)
hanan khorshid said…
timoo

أنا اللى مبسوطة بزيارتك
وبالفعل علاقتنا الرمزية بتتوثق بأشيائنا بطريقة قد تدهش الآخرين
قد يمثل طقس عادى جدا او تفصيلة صغيرة محور هاااام جدا فى يومنا وده احلى شىء بحميمية التفاصيل
فشكووول said…
السلام عليكم
تحياتى
سلامة دماغ حضرتك
كتبتى عن حاجات كتير لدرجة انى فى الاخر نسيت المواضيع
لكن ما علهش .. ما هى الام هى الحضن الحنون لكل اللى موجودين فى البيت
وبرضه مسرحية عفورتو مش وحشه قوى يعنى
تحياتى
Emtiaz Zourob said…
استرجاع الذكريات جميل جدا ، انا ايضا احتفظ بالجوائز على بساطتها لحتى الان ..
سعيدة بوصولي هنا

دمت بخير وتقبلي خالص تحيتي وتقديري.
hanan khorshid said…
فشكول مرسى كتير على الزيارة
hanan khorshid said…
حسان مرسى كتير على الزيارة ... وان شاء الله هشوف الجروب
hanan khorshid said…
وجع البنفسج اشكرك بشدة على الزيارة
فعلا هدايا الطفولة والدراسة خاصة لا تنسى ابداااااااااااااا

Popular posts from this blog

فوبيــا اللــوبيـــــا

فوبيا الأماكن المرتفعة فوبيا الحشرات السوداء فوبيا الظلام فوبيا الزلازل فوبيا الأماكن المغلقة فوبيا الزحام  فوبيا الأشياء الصغيرة المتجمعة أو المتلاصقة  كالثقوب أو النتؤات ( ودى أسوأهم بالنسبة لى ) معرفش ليه   كفوبيا اللوبيا وحرف (W) لما بيتكتب كابيتال على الكيبورد عدد متلاصق منه كمان زى شكل قطاع عرضى من البصلة متعددة القلب وكشكل بيت النحل وحبيبات الجير فى إعلانات كلوس آب فوبيا عدم القدرة على الإنجاز فوبيا مواجهة الجماهير أنوااااااااااااع كتيييييير تشعرنى بالعجز التام وعدم القدرة على المواجهة أكثر ما يثير استغرابى فى موضوع الفوبيا ده انه ممكن يكون وراثى غريب أن فى أنواع  أخدتها من أمى الأغرب  أن فوبيا مش مشهورة زى فوبيا الأشياء المتلاصقة دى موجود فى اسرتنا بأكملها رغم ان فى ناس ميعرفوش عنها حاجة .... الأغرب تحكمها فى أعصاب الأنسان وإفقاده أى حركة للمقاومة فى بعض الأحيان قد يكفى صرصار واحد لإصابتى ب هارد أتاك !!! لا استطيع أيقاف الصراخ والبكاء والرعشة إذا تأكدت من أنه بيطير (وهو غالبا بيطير ) ما يؤكد لى

رسالة الى إمرأة وردية اللون

إليك يا سيدة كل الأزمنة   يا حنين الأمس ... ومرارة الحاضر .... وغموض الغد اكتب الى امرأة سمراء، حزينة العينين ،تغزل ضفائرها السوداء اليك اتيت مهشمة النفس ... مظلمة القلب ابحث عن عمر ضاع فيكِ  واشيع احلام ماتت على اعتابك ابحث بين حناياك عن مفاجأت قد تخبئها الأيام ولكنى اعرف ان عصر المفاجآت قد ذاب بين دفات الرواية القديمة  التمس منهم الأمل ... ولا اجد بحقائبهم سوى اليأس والفراغ  نفيق فى صباح جديد  على اصوات مألوفة   نرتاد الأزقة العتيقة  لنرى بسمات دافئة فى صباح شتوى غائم  سنواتنا المحفورة على جباه المقاهى قد يحملنا الحزن فى سيرنا لكن تجمعنا الفة الارض.. والوطن.. وشمس تشرق من جديد ............................. حنان خورشيـــد مصـــــر جدارية : أدون وطنى  

مراوغة

قادما؛ يتلمس الغريب خطواته علي أثر الضوء المنبعث من البيت •••• في الشرفة أقف حائرة؛ أحثه علي الخطو ؟؟ أم أغلق الضوء ليرحل ؟؟ ***