تفتكر مكنتش بحبك فعلا
سؤال غريب
مؤلم إلى حد الصداع اللامنتهى
طب لو مش بحبك فعلاً ليه بموت فى اليوم ميت مرة و أنا شايفاك و حاسة انك مكسور
( و أنا اللى عمرى ما أتالمت لألم الضحية )
ليه نفسى أطبب عليك و أمسح الدمعة اللى مستخبية
ليه نفسى أرفع راسك بايدى و أبص فى عينيك و أقلك أنا لسة عايزاك
ليه نفسى ابكى على صدرك و اقولك إنت أحسن مننى باللى جواك
و إنك فى فترة البعد اللى انا قررتها هتلاقى حد يحبك بجد ويستاهل كل الى جواك
و إن أنا مش هلاقى حد فى صدق مشاعرك ووداعة احساسك
ممكن اكتشف انى بحبك فى نفس الوقت اللى هتكتشف فيه إنك كنت متعود بس ؟؟؟
طب لو مش بحبك بجد؟؟؟؟
ليه مبطلتش كلام عليك مع كل الناس من 3 ايام
ليه جمعت صحابى ورحت آخد الهوت شوكلت علشان احس بالدفا اللى تايه بقاله 3 ايام
و ليه ساعتها لما رنت آخر أغنية بعتهالى فى ارجاء الكافيه
فضلت أبكى و محدش فيهم عرف يسكتنى
لو مش بحبك بجد ليه من ساعتها كل مال اشوف حد فى التليفزيون أو الشارع
أحس أنه شبهك فى حاجة
ده واخد عينيك و ده واخد ابتسامتك ده نفس البادى بتاعك و ده نفس ستايل الشعر
ليه زميلى اللى كنت باستسخفه جدا بقيت احس انه انسان بيفهم
لمجرد ان له نفس رنة الموبايل
لو مش بحبك بجد ؟؟؟؟؟!!!!!
ليه كل يوم اروح الشغل الصبح ابدأ اليوم ببلاى لست بتضم كل الأغانى اللى كانت مننك
و اللى كانت بتزيد كل يوم
ليه كل يوم قبل مانام أفتح الانبوكس بتاعى و اعيد قراءة كل الرسايل اللى كلها لوعة و حب
و اللى كنت زمان بحتفظ بيها لمجرد نقلها فى صندوق آخر معجب
ليه كل يوم انزل من البيت اقول انى مش قادرة اشوفك و اقول انى هتفاداك لو شفتك
و الاقى نفسى غصب عنى بدور عليك زى المجنونة
و بمشى فى نفس المكان اللى بتمشى فيه
لو مش بحبك بجد ؟؟!!!!
ليه كل كلامك لسة بيرن فى ودانى ليه فاكرة كل تعليقاتك و لوازم كلامك
ليه بقيت أدعى ربنا من جوايا بجد إنه يحفظك و يخفف عليك الصدمة
ليه بقيت أدعى ربنا من جوايا إنه يقربك منى تانى و يهديلى نفسى علشانك
لو مش بحبك بجد ؟؟!!!!
ليه بقيت بنام كتير ليه بقيت أكره التليفون و أصحابى
ليه بقيت أكره أوضتى و الكمبيوتر بتاعى و كل طقوسى اليومية
ليه بقيت أكره كتبى و البيانو و مرايتى و لبسى و مكياجى
ليه بقيت كل ما أفتح عينى الصبح أكره قوى إنى صحيت
ليه بقيت أهرب من أى حاجة بتفكرنى بيك لحاجة تانية تبكينى عليك
Comments