فى عيد ميلادى الخمس و عشرين
قررت أعيد حساباتى
فى عيد ميلادى الخمس و عشرين
عايزة أهرب من الغربة اللى خايفة إنها تتضخم جوايا
فى عيد ميلادى الخمس و عشرين
عايزة أحسب كل ثانية جاية
علشان متضيعش لأنى إكتشفت إن العمر بيجرى بسرعة قوى
و الفجوات بتوسع
و الوحدة بتزيد
و كل اللى بنخاف منه بيقرب مننا..
أول مرة أحس إنى عايزة أستخبى من حاجة
زى عداد العمر اللى خد منى من غير ما احس
يمكن إنى كنت بحاول دايماً أستمتع بكل ساعة فى عمرى و ربنا ساعدنى على ده
بس كان جوايا دايما الصوت و الإحساس الى بيخنقنى و مش بيخلينى أستمتع بأى حاجة و بدل ما أفكر فى اللى جاى أزعل على اللى راح
ربع قرن مش مصدقة إنه مر
ربنا أكرمنى فبه بحاجات كتير قوى
بس لسه مكسوفة منه لأنى لسة بدور على نفس الحاجة و مش لاقيها ...
لأ إن صح العبير مش قادرة أميزها
بكره ضعفى قووووووووى و أنا بأبدأ أكره عقرب الساعات اللى بينط بينا من سنة لسنة من غير ما نحس
ضعفى إمبارح و أنا شايفة عقرب الثوانى بيقرب على الساعة 12 و مش قادره أمسكه
ضعفى فى إنى أنسى اى حاجة إلا طعم الألم و الوحدة اللى ملهمش مبرر .
25 سنة و أنا عارفة إن ربنا هو الوحيد اللى بيحمينى من نفسى و من ضعفى
هوالوحيد اللى لما بفكر فيه بحس بالأمان ، إلا إنى مقصرة كتييييييييير فى حقه
بس واثقة إنه دايماً معايا و إنه هو اللى بيرممنى بعد كل ازمة
و إنه ممكن فى سنة يحققلى إللى اتمنيه 25 سنة
......
فى عيد ميلادى الخمس و عشرين مش عارفة أعيط علشان إكتشفت إنى كبرت على كده ......
المشكلة إنى إكتشفت إن بعد 25 سنة من الراحة التامة و عدم مواجهة أى صعوبات فى الدنيا لسة مش مرتاحة ...... حد يعرف ليييييه؟
Comments
كل سنة و إنتى إنتى
برقتك .. بجمالك .. بتفرد ششخصيتك
طبعا عارفة و فاهمة كل اللى انتى حاسة بيه
ببساطة .. لأنى مريت بيه
هدية عيد ميلادك نصيحة
إغضبى يا حنان
ثورى
هاجمى
أوعى تتضعفى
و إعرفى للأبد إنك مش وحدك أبدا ... أبدا
لو كل الناس راحت
حنان عمرها ما هاتسيبك و تمشى
إنت أقوى بنفسك و بشخصيتك و تفردك و حتى بجنونك
إنتى أقوى بحنان
كل سنة و إنتى .. إنتى