Skip to main content

عن تــــربية البنـــت المتشـــردة


لا أستطيع التحكم بنفسى
حقيقة كنت أعيها منذ طفولتى
ويؤكدها المحيطين بى دائما - "انتى مبتعرفيش تيجى على نفسك ....الخ
ولكنى لم اكتشف قبحهـــا سوى الآن
أشياء كثيرة أقسر نفسى على القيام بها ولا استطيع
ولا ادرى السبب هل هو الدلع المفرط الذى ربيت مزاجيتى عليه
ام هو ضعفى فى انتهاج اى شىء لا يتماشى مع رغباتى
اشياء كثيرة اذكر نفسى بها دائما دون جدوى
و وهنا شديدا احسه بعد كل فشل فى استخدام إرادتى
شعور بالخجل الشديد من نفسى الغبية
***********
ضعف شديد
فى كل مرة أصل فيها لمقر عملى متأخرة
وأواجه نظرات طاقم الامن
ثم كلمات مديرينى
وفى اليوم التالى أتكاسل ثانيا عن الاستيقاظ مبكرا و وأهرول فى البحث عن تاكسى يقلنى "لأن كل يوم الباص يفوتنى " واصل لعملى بنفس الفارق المتمثل فى دقائق معدودة
*************
أكره ضعفى
فى كل مرة أنظر فيها لإبهام وسبابة قدم ابى المبتورين
ثم أنظر لقدمى
وأعد نفسى وأعده بعدم تناول أى سكريات مدى الحياة لاتفادى هذا القاتل الصامت
ثم فى الصباح التالى أخرج من حقيبتى قطع الشيكولاته وألتهمها مستمتعة بمذاقها ورائحتها
********
فى كل مرة أنظر بها لمرآتى وارى الإجهاد يحيط بعينى وأعد نفسى بعدم التفكير بشىء مؤلم قبل نومى
وفى ذات الليلة ابقى فى فراشى لأتأمل كل القضايا التى الاقى صعوبة فى حلها
ومنها اذهب لكوابيسى المعتادة
********
ضعف شديد
فى كل مرة أشاهد فيها مسلسلى المفضل
"desprate house wives"
وأتعجب من رشاقة بطلات تعديا الاربعين ولازلن بملامح شابة
وأقسم لنفسى باتباع حمية تقضى على بعض الكيلوات التى اكرهها واتمنى دائما تفجيرها
وأن أستخدم هذه الآلة الرياضية الضخمة التى احضرتها منذ عام وانحسرت فائدتها فى تعليق حقائبى عليها
وبعد عدة ساعات افتح كيس الشيبسى العملاق وابدأ بتناول الرقائق المميتة
وأنا متربعة على فراشى أنظر للأوربتراك الكبير فى يأس وحنق على بدال الذراعين الذى يشبه قرون الغزال
***********
فى كل صباح وأن انظر للكتب الملقاة على ارضية حجرتى فى عجالة
والى اكسسواراتى الملقاة باهمال على الوسادة وانا أنوى لليوم المائة على التوالى
بأن أرتب حجرتى لدى عودتى عصرا
وفى الرابعة تماما أخلع ثيابى وأصلى سريعا ثم أذهب لحياة بلا متااعب لاتاتى سوى بالنوم
أو أفتح شاشة اللاب توب اللعين الذى ياكل الساعات بلا هوادة
***********
فى كل مرة أعد رجل أحبه بالحديث بهدوء عند اختلافنا فى المرة القادمة
وانا أرى فى عينيه نظرات اليأس منى
ولا اشعر بانفعالى حين نختلف فى قضية ما فى حوارنا التالى
الا حين يقول لى " بالراحة" فاخفض عينيى بخجل واخفض الفوليوم بفارق كاريكاتيرى
لا يلبث ان يعود تدريجيا للأرتفاع
"سامحنى"
***********
ضعف شديد فى كل مرة أبكى فيها على امور كثيرة تافهة وهامة
ومحاولات شديدة لاقناع نفسى انى كبرت على كده
واتفاقات داخلية " بتركيب جلدة " عشان عينى متسربش علطول
اجدنى فى اليوم التالى ابكى بانهيار
لان هناك صرصار كبير فى مدخل العمارة
أو لأن حد خبطنى جامد فى دراعى
او لان الصداع زاد نوعا ما
***********
فى كل مرة أضع البلوك نوت الذى اقتنيته مؤخرا
مع إخوانه فى جزء من الخزانة امتلأ بهم
رغم انى لم افرغ من البلوك نوت الذى استخدمه حاليا
وأقنع نفسى أن هوس اقتناء المفكرات يبدد النقود والمساحات
وأنه يكفينى استخدام المجموعة اتى أملكها
ولكنى انسى كل شىء حين أجد بلوك نوت فكرتها جديدة
او الوانها حلوة
ولا اشعر بنفسى
سوى عند الكاشير او حين أعود وأفاجأ بالعدد الذى اقتنيه
************
حين أأخذ موقف شديد مع نفسى وأنا أشرح لها عدم جدوى مشاهدة الافلام الرومانسية الأجنبية أو العربية لانها ملهاش علاقة بالواقع وتبدد الوقت عالفاضى
ولا اتذكر شىء من هذه التوعية حين اعثر مصادفة اثناء بحثى فى القنوات على فيلم لميج رايان او هيو جرانت مذاع mbc max على
أو فيلم "مع حبى واشواقى" او "شىء من العذاب"
وأذهب مغيبة لتحضير إناء مللوء بالفشار الطازج واعود مسرعة عشان الحق الفيلم
***********
فى كل مرة أحاول فيها تعلم هذه اللعبة السقيمة التى يعشقها رجل أحبه
ويحاول تعليمى اياها بلا فائدة وفى كل مرة اعده بانى ساجيدها المرة القادمة وفى المرة التالية انظر باستهجان للاعبى كرة القدم العالميين وهم يتحركون كالإنسان الآلى
وأترك ذراع البلاي ستيشن فى يأس بعد أن يدخل فى شبكتى عدد غير مسبوق من الاهداف واذهب لتحضير القهوة له
وأدعه يبحث عن شخص آخر يشاركه اللعب
**********
تعبت من نفسى أوى
نفسى أكون حازمة معاها أكتر من كده
لا أنا لازم أكون حازمة معاها أكتر من كده
أنا بجد هتغير
هتغير جدااااااااا

من أول بكرا
بس بلاش النهاردة
لان فيلم
the wedding planer
جاى كمان شوية وفى كيس شيبسى كبييييييييير بالجبنة
اتفضلوا معايا


Comments

سعدية said…
بالهنا والشفا يا جميل :)

مش عايزه احبطك بس التغيير شى مش سهل
لازم العادات اللى مضايقاكى تكون بتسبب الم رهيب علشان تقدر برمجتك العصبية تغيرها

و انا شايفه ان كل اللى مضايقك لطيف
ومش مشكلة ( الا اكل السكريات )
:)

اعملى اى حاجة فى الدنيا بتخليكى مبسوطة مادام مش بتاذى حد
حتى لو كل الناس شايفه ده ضعف

صدقينى العمر اقصر من ان احنا نضيعه فى محاولة تغيير عقيمة لاروحنا
واحساس سخيف بالذنب على كل حاجة مش ذنب اصلا

خليكى متشردة جميلة بتحب السينما الرومانسية وبتاكل الفيشار وبتشترى مائة مفكرة مادام ده بيسعدها

ربنا يحلى ايامك وتبقى اجمل دائما
:)

مع كل حبى
hanan said…
سعدية
انا متشكرة جدا على زيارتك مدونتى
تعليقك حلو اوووى
للاسف اناكنت فاكرة زيك كدا
وكنت
دايما اقول محدش له حاجة عندى طالمل مش بعمل غلط او حرام
بس انا اكتشفت غير كده
لان محدش هيسييبك فحالك
محاولات اللوم والتقريع مبتنتهيش
لازم تكونى صح وان هاندرد برسنت
لان محدش هيفرق معاه تكونى سعيدة ولا لا
اهلك مثلا بدل مايفكرو ايه هيخليكي مبسوطة
بيفكروا ازاى تكونى انسانى متوازنة وحكيمة وسليمة صحيا ونفسيا وشكليا
وحتى لو اهلك شالو ايديهم
كل الناس التانية هتتبرع وتديكي نصايح تحسسك دايما قد ايه انتى اصغر عنصر فى المجتمع
*******
انا متشكرة اوى على كلامك الجميل ليا
وبالنسبة للنصيحة كنت اتمنى افضل عند السن اللى اقتنعت فيه بها
Anonymous said…
نص رائع
Anonymous said…
:احمد بيه روبي :
حقيقي عمل رائع جدا
وغاية في التناغم
وبجد انا اول مره اعمل كومنت في حاجه
بس فعلا عمل يستاهل
تحياتي ليكي وتقبلي زيارتي
وياريت اكون تقبليني ضيف علي
مدونتك
وشكرا
hanan said…
احمد "بيه"روبى
انا بشكرك جدا على زيارتك مدونتى
ومرسى خالص على الوصف الحلو ده
وانا اقدر لك جدا كسرك لقاعدة عدم التعليق على المدونات
تحياتى لك
تعرفي ان كتاباتك ممتعة جدا

اوعى تتغيري . انت كده حلوة وتلقائية

مافيش احسن من السايكو
hanan said…
طماطم
انا متشكرة جدا على اطرائك وعلى زيارتك
انا بحب مدوناتك اوى وبالذات من اجل عينيك
"فى الفيفورت بتاعت الجهاز"
خاصة وان التخص بتاعك هو اكتر تخصص كان نفسى امتهنه
بس لما كبرت اتاكدت ان ربنا عوضنى
لان ناس كتير من الى حواليا
بيطلقوه عليا كصفة
من غير ما اكون درسته
تياتى الشديدة لك
حنان ..
انا بحب الشيبسي اللي من غير نكهات :)
و بحب صدقك في الكتابة ..
انتي مش بتبالغي ..
دة جميل اوي
hanan said…
شيماء
اخيرا جيتى
انا متشكرة جدا
على زيارتك
وعلى وصفك لكتابتى بالصدق
وعلى فكرة انا مؤخرا اكتشفت فعلا
ان شيبسى الملح احلى حاجة
وعلى فكرة بالخل وبالجبنة العادية مش المتبلة
حلو اوى
لمستني أوي
وفيها الكثير مني
يسلم قلمك
احنا صعبين بس طيبين
مش كده ;)?
كلامك بسيط وفيه حاجات فعلا بكون فيها زيك بالظبط وحاجات تانية لأ
بس عادى ساعات الواحد بيحبط من نفسه وساعات تانية بيقول لألألألألألألألأ يعنى لألألألألألألأ
وعموما ربنا يقويكى على نفسك وتعملى اللى انت نفسك فيه بجد وبحزم وبحب
dam3et2ontha said…
كلنا هيك مش بس انتي بس بدرجات مختلفة شوي

كنت كتير منغمسة في الكتابة و بالأخر فطست ضحك

نسرين
hanan said…
ايمان الميهى
مرسى خالص على الزيارة
بس مش دايما طيبين
لازم لحظات شريرة كده فالنص

رحيق الحب
ماهى مشكلتى دايما انى بقول لأ يعنى لأ
وبعد 5 دقايق اقول مش اوى كده خير الامور الوسط
وبعد ما اضحك على نفسى يتحرك المؤشر من الوسط لاقصى الشمال


دمعة انثى بجد انا فعلا بفرح جداااا بزياراتك واشادتك بالمدونة اعمق تحية لاهل الشام

Popular posts from this blog

فوبيــا اللــوبيـــــا

فوبيا الأماكن المرتفعة فوبيا الحشرات السوداء فوبيا الظلام فوبيا الزلازل فوبيا الأماكن المغلقة فوبيا الزحام  فوبيا الأشياء الصغيرة المتجمعة أو المتلاصقة  كالثقوب أو النتؤات ( ودى أسوأهم بالنسبة لى ) معرفش ليه كفوبيا اللوبيا وحرف (W) لما بيتكتب كابيتال على الكيبورد عدد متلاصق منه كمان زى شكل قطاع عرضى من البصلة متعددة القلب وكشكل بيت النحل وحبيبات الجير فى إعلانات كلوس آب فوبيا عدم القدرة على الإنجاز فوبيا مواجهة الجماهير أنوااااااااااااع كتيييييير تشعرنى بالعجز التام وعدم القدرة على المواجهة أكثر ما يثير استغرابى فى موضوع الفوبيا ده انه ممكن يكون وراثى غريب أن فى أنواع  أخدتها من أمى الأغرب  أن فوبيا مش مشهورة زى فوبيا الأشياء المتلاصقة دى موجود فى اسرتنا بأكملها رغم ان فى ناس ميعرفوش عنها حاجة .... الأغرب تحكمها فى أعصاب الأنسان وإفقاده أى حركة للمقاومة فى بعض الأحيان قد يكفى صرصار واحد لإصابتى بهارد أتاك !!! لا استطيع أيقاف الصراخ والبكاء والرعشة إذا تأكدت من أنه بيطير (وهو غالبا بيطير ) ما يؤكد لى ان الفوبيا خاصتى تقتصر على الحشرات السوداء ..هو أنى أحب الفأر شكلا وليس موضوعاً طبعا .... فى حين أن الصرصار …

رسالة لن تصل :(

صباح مشمس آخر بدونك جدتي
السلام علي روحك الطيبة أينما حلت
وكأن عادية الاشياء تفرض وجودها
وبعد أن أفتح عيوني علي بكاء الصغير أنتظر قولك اليومي لا يقابلني إلا الصمت 
 يتوقف الصغير وينظر خلفي مشدوها ألتفت كي أراك تجلسين علي حافة الفراش تسوين شعراتك فلا يقابلني سوي الفراغ
ألهث في أحلامي خلف صوت أقدامك علي الارضية الخشبية ليلا 
 يترافق صوتك جليا مع كافة القضايا والمواقف والمشاحنات اليومية المعتادين علي دلوك فيها، أيصيبنا التعود باحد أنواع الجنون أم أن روحك الطيبة تخبرنا بما يعتمل علينا
تتكشف لي حقيقة كل نصائحك عن إطعام الصغير والقطة وإشعال الضوء ليلاً 
عدم تكرار طقوسك اليومية ينشر الخواء في أنحاء الدار
 ذلك المقعد المرئي واللا مرئي يخفق قلب كل من يمر به ويهاب الجلوس عليه؛ المقعد الفارغ الفاغر فاهه ينظر إلينا بتشفي
الطاولة الصغيرة التي تجاوره والتي ابتاعها لك أكبر أبناءك ليقرب اشيائك منك علي  مدار اليوم تتوسطها الساعة المنبهة التي احضرها لك لسهولة ادراك الوقت
ما حولها كئيب وفارغ إلا من علامات قيعان الأكواب التي احتسيت فيها شايك مؤخرا نرفض إزالة الغبار والفتات عنها 
وحدة الأدراج الصغيرة المجاورة لفراشك …

الكائن البيضوحباطي فى حياة كل مننا :(

الكائن البيضوحباطى *
كائن يتغذى على جرعات النكد المتكررة
وموجات الاحباط الى يبثها اليك على مدار اليوم
البيضوحباطى يعرف جيدا كيف يحيلك إلى كائن يائس محبط
يعرف كيف يمتص الحياة من أنفاسك لتغدو شخص ميت يمشى ويتكلم كالنائم
الكائن البيضوحباطى
يجد دائما الشماعة متى احتاج اليها
ليعلق عليها اخطاؤه وفشله
الكائن البيضوحباطى
منزه عن الخطأ :/
هو مبيعملش حاجة وحشة بس الكون كله هو اللى ضده
وكل الناس مستقصداه -_^
الكائن البيضوحباطى
متمكن جدا فى تخصصه
يستطيع تحويل اليوم فى لحظة إلى يوم عصيب جداااااا
وتحويل الاوقات الجميلة الى مشاحنات ونكد غير محدود
لا يفكر ابدا فيما يجب عليه فعله
فقط يفكر فيما يحتاجه
يجد سعادته فى تحويل لمعة الفرح والحياة فى عينيك
إلى وميض حزين ملئ بالهم والغم
 الكائن البيضوحباطى اساسى جدا فى حياتك
قد يكون بعيد قد يكون قريب
لكنه دوما موجود
ربما مبعوث لتخليص ذنوبك واخطاءك فى حق آخرين
أو ليسهل دخولك الجنة
الكائن البيضوحباطى لا يوجد علاج له
فقط يمكنك انت البحث عن سبيل للعلاج
كإغلاق أذنيك عند ارتفاع انزيم الاحباط فى كلامه
أوالتشويش على جهاز الاستيعاب الخاص بك
كى لا تفهم ما يفعله
ايضا يمكنك أن تتناول قطعة من الشوكو…