بنـــت ســايــكو

مش عارفة نفسى افسر احساسى بيك موجود فى نفسى بس مش عارفة فين عايش جوايا بس فى اى مكان تحديدا ؟؟؟؟؟ فى لحظة احسك آخر حد عايزاه و احس ان دنيتى ضيقة عليك و انى فعلا مش عايزاك و مجرد ما تبعد بجد احس انى بحتاجك قوى و انك اهم شىء فى حياتى و ان وجودك حواليا هو الدفا اللى عشت ادور عليه طول عمرى و اللى بيتوه لما تختفى نفسى يبقى فى ترمومتر يعرفنا اسم مشاعرنا و كانها درجة حرارة

إكتشفت بداية ضياع الملامح لما إكتشفت حاجة غريبة كنت دايما ً فى شرودى و زعلى و فرحتى و كلامى فى التليفون اشخبط على اى ورقة قدامى ملامح وجه و غالبا عينان و حاجبان بس بقالى فترة شخبطتى فى اى مود عبارة عن نص وجه عين واحدة و حاجب واحد و نصف انف و نصف فم و شعر مهوش من غير نص تانى للصورة يا ترى ده تعبير عن التمزق اللى حاساه و لا عن افتقادى بقية نفسى و لا عن إن مكتوب على كل إنسان يعيش نص الحاجة دايما و لا ممكن أكون لغيت نص الوجه التانى عشان مسبش مكان لفرد تانى فى حياتى و اعيش مجرد نص مش عايز نصه التانى

زمان كنت فاكرة الحب ده حاجة كبيرة قوى زى إنك تقف قدام اللى بتحبه و تاخد رصاصة بداله و بعدين إكتشفت إن الحب أسهل من كده بكتير إنك تيجى على نفسك و تتنازل عشان تقدر تتفاهم مع الأنسان الى بتحبه هند صبرى - لعبة الحب

شاهدت اليوم العرض الرائع " جنينة الأسماك"و فوجئت بعمق العمل بعد كل ما نشر عن آراء الجمهور و النقاد و انسحاب الأبطال أثر ذلك من العرض الخاص و تعجبت من ورود تلك الأحكام بعد أيام قلائل من العرض و ذهبت و معى خلفية بسوء مستوى الفيلم و تفككه و لكنى فوجئت بعمق رسالة العرض و هو لا يتنافى مع كونه لا يعبر عن جسد كامل كما أعتدنا فى الفيلم و الرواية المصرية مما عاد بنا لأفلام يوسف شاهين فالحبكة الدرامية و وجود الشكل التقليدى للعقدة و الحل ليس شرطا ً أساسيا لنجاح العمل . فالفيلم يقدم صور نفسية مختلفة من مجتمعنا ليس هناك علاقة بين معظمها و إن كان العامل المشترك بين الجميع هو الأغتراب و التوحد الذى أصبح السمة الرئيسية المميزة لمجتمعنا والعامل المشترك بين البطلين هند صبرى و عمرو واكد هو هروب كل منهم من غربته إلى سماع أو التلصص على آلام الآخرين هى من خلال البرنامج الذى تقوم بإذاعته ليلا و هو من خلال إستماعه إلى مرضاه تحت تأثير البينج و الجولة حول جنينة الاسماك التى يذهب اليها راغبى الابتعاد عن الأعين و يعتبر الماستر سين مكالمة د / يوسف للبرنامج الخاص بها اللى حاول فيه د/ يوسف فهم حقيقتها و وح...

إهداء إلى my dreams أو دعاء تعليقا عالبوست بتاعها " هفضل اقول لا لحد امتى " http://heavenlover54.blogspot.com/2008/01/blog-post_2246.html للاسف انا كنت فاكرة زيك بس اكتشفت اننا مش عايشين فى العالم لوحدنا لكى حق فى كل شىء لكن فموضوع الجواز تمشى حسب ما المجتمع شايف كل اسس الاختيار اصبحت دلع و نوع من انواع البطر على نعمة ربنا و التوافق و الميول و لغة الحوارات حتى الراحة النفسية للشخص اصبحت رفاهية اختيار مش من حقك تعملى بيها و تبدى سلسلة الكلام اللى يحرق الدم "ده زى الفل و اى واحدة تتمناه" " ياللا بقى هو حد لاقى جواز" "هتكحكحى و سنانك هتقع و تبقى لوحدك محدش هيقعد جنبك" "متتنكيش قوى اكتر حاجة دلوقتى البنات " أنا لسة بناضل بس ابتديت اتعب من الضغط لكن برده لسة مستنية اللى مش موجود ده و واثقة انى ان شاء الله هلاقيه فقدامك يا بنتى حاجة من الأتنين يا تستنى حد بكل المواصفات اللى بتحلمى بيها و طبعا مش قصدى المادية أقصد المعنوية و الذهنية و الكيميائية و تفضلى عايشة وهم إيجاده زيي كده و تنسى بقى الزن و وجع الدماغ يا ما زى ما بيقولولى اعملى نفس مغمضة ...

( خواطر نفسية ) عندما يكون طموحى إلى المثالية هو جوهر إحساسى بالمرارة و إنتظار القليل الخاوى ... هو السبيل الوحيد للحياة بسعادة أو يظل تكبير الدماغ هو الحل الأمثل فلا ثقة فى القادم و لا إنتظار لقليل أو كثير و لا إدراك حى لما أريده و لكننى رغم كل شىء.... لا زلت أحلم بأشياء رائعة و أغزل من احلامى نجوما ً أزين بها جدران غرفتى فى الليالى الباردة و رغم كل شىء لا زلت مستمعة بإنتظارى .. لازلت ارى كل الاحلام متاحة وأحلم بالصدق بالأحتواء بالطمأنينة بحنان و دفئ حقيقى بشخص يولد بداخلى قدرة على الوثوق فيه و النوم فى مقلتيه و لكن كيف البحث عن تلك المعانى فى عالم محموم يقتل الحلم قبل أن يقتل الحقيقة يسخر من الاحاسيس كمقياس للفرحة عالم يبحث كل من فيه فقط عما يريده فى جيل أصبحت الأنانية هى السمة الرئيسية المسيطرة على كل أفراده و التربص و تسفيه المبدأ و سمات الحرب هى محور كل علاقة ثنائية حتى و إن كان مسماها الكوميدى ( حب ) فى جيل فقد العفوية ..... فقد تلقائية المشاعر و التصرفات فالخطة دائما ً قبل الأنطلاق .... و التخطيط مرتبط بكل شىء تخطيط لكلماتنا لمسار علاقاتنا حتى مشاعرنا و المناورة و التلاعب هم ال...

عرفت بجد معنى الخوف كل ما الوقت بيمر و إحتكاكى بالحياة بيزيد بخاف كل ما أعرف ناس واحبهم بخاف نضيع من بعض كل ما بقف على مفترق طرق بخاف أغلط فى الاتجاه كل ما يعدى يوم بخاف من بكرة اكتر بخاف يروح الدفا .. و البرد يزيد بخاف على سريرى الناعم ... أحسه قيد حديد بخاف على اللى جوايا قوى بخاف على كل حاجة حلوة تتحول لألم قديم و البلوك نوت بتاعتى يصبح ورقها أصفر و كلامها بهتان بخاف على معانى و اأشخاص بتلمع فى دماغى أكتشف إنهم شىء متغطى صدأ بس بيلمع من الرخص بخاف على كل حاجة حلوة بحبها تطلع أكذوبة أو شىء هلامى أنا اللى نفخت فيه علشان يبقى حقيقة بخاف أكره حد لأنى عارفة أنى هكره معاه 10 و 100 شىء تانى بخاف صومعتى تزيد و مقدرش افتح الشباك و أفضل مصدقة إن دنيتى متكفيش حد معايا و ملاقيش حد يقنعنى إن المساحة الباقية هتكفيه بخاف قوى من الوحدة اللى بتسحب اللى حواليا منى واحد ورا التانى بخاف قوى قوى قوى و شايفة قدامى بؤرة سودا فى آخر الممر بتكبر قوى قوى عارفين ليه؟؟؟؟ لأنى بقرب منها بسرعة قوى ( بنت ســـايـــكو )